من هم الذين يصنعون التسلية .. ألعاب الكمبيوتر .. الجزء الأول

من هم الذين يصنعون التسلية.... ألعاب الكمبيوتر.........الجزء الأول

شي مرة فكرت وأنت عم تلعب شي لعبة عالكمبيوتر...كيف هاللعبة هيك...كيف الخريطة بتتغير وكيف السلاح بيتغير وكيف السلاح تصمم هيك والأصوات والموسيقا التفاعلية باللعبة صارت هيك

أكيد كل واحد فينا خلص لعبة وختمها وطلعتلو بعدها قائمة ال    Credits  والكثير كانو قليلين صبر وطلعو براتها

بهالقائمة هي  رح تعرف أنو كان في جيش من الأشخاص اللي كانو سبب تسلايتك بهاللعبة

بالمقال اليوم رح نحكي عن الجنود المجهولين اللي اسهموا بمعاركنا بألعاب باتل فيلد وكول أوف دوتي وخلقولنا عالم التسلية ...ورح نحكي عن مميزات كل حدا عم يشتغل بتصميم اللعبة لتعرف حالك بالنسبة لمستقبل إذا حبيت تدخل هالمجال شو اللي بناسبك بعالم صناعة الألعاب

أعضاء فريق صناعة لعبة كاملة..

1_ Producer:

بس نسمع كلمة منتج رح نفكر بالمصاري ...بعالم الألعاب المنتج ما بس بفكر بالمصاري المنتج ممكن يكون مدير الشركة وممكن يكون مدير لمكتب من مكاتبها وأكيد الشركات الكبيرة ألها عدة فروع وبكتير دول  

المنتج رح يعرف كل دولار وين عم ينصرف وكيف عم ينصرف رح يعرف يختار الأستوديو ومعدات الأستوديو لرسم الشخصيات  حسب الميزانية المخصصة للعبة وفي منتجين بكونو عم يشتغلوا لعبتين بنفس الوقت رح يقدرو يميزو بين عالمين مختلفين ويدرسو الناحية المادية لفريقي التصميم ...

2_ project lead:

قائد المشروع ...المبرمج المخضرم والخبير اللي ألو باع طويل بمجال الألعاب واكتسب صفة القيادة لأنو بيعرف يختار الشخص المناسب للمكان المناسب

قائد المشروع رح يكون الجهة اللي رح تتواصل مع المنتج وهوي اللي بيختار مواصفات العتاد اللي عم يشتغلوا عليه المبرمجين والمصممين ...رح يكون مع أصغر مبرمج باللعبة ورح يكون مع المنتج والشركة المنتجة ...رح يتمتع بالذكاء وقوة الشخصية والخبرة بمجال ويتميز أنو قراراتوا قوية وما بيتراجع عنها..وأكيد يكون على دراية بالأمور المادية لأنو رح يتناقش فيها مع المنتج ويحصل من خلالها على الدعم..

3_designer lead

قائد المصممين ...رح يكون قائد ل عدد كبير من فرق المصممين ...رح يتعب كتير ويأشرف كتير ويعطي ملاحظات كتير ...التصميم بالألعاب متعب أكتر من البرمجة  لأنو مانوا شي محدد ...رح يتم تصميم شخصيات اللعب وتصميم البيئة بما فيها من ماديات ومافيها من طقس وتأثيرات ...رح يكون عم يأشرف على المهندسين اللي عم يتعاملوا مع محرك الرسوميات ...قائد المصممين رح يكون متل أي مصمم يمتلك الموهبة والخيال الواسع بالدرجة الأولى ويمتلك الذكاء بالدرجة التانية ..والصبر الكبير لأنو التصميم بعالم الألعاب كتير بياخد وقت وكتير بدو تركيز...

4_programmer lead

قائد المبرمجين ...المبرمج الأول باللعبة ...وأكتر مبرمج بالمشروع   اشتغل ألعاب وبرمجها ...الفريق اللي رح يديروا رح يكون أكبر فريق بالمشروع …ورح يحمل أكبر مسؤولية باللعبة لأنو الأكواد هيي المشرف الأساسي للتحكم باللعبة وكل حركة وكل توجيه عم يصير باللعبة والخطأ الصغير بكلف ملايين بمشاريع الألعاب..قائد المبرمجين رح يكون شخص ذكري بالفطرة بالدرجة الأولى...بيملك الخبرة الكبيرة بمجال اللغات البرمجية المتوسطة المستوى والعالية المستوى ...رح يملك القدرة الابداعية كتير خصوصي بمجال الذكاء التفاعلي ويقدر يكتب تعليمات تبين أنو خصومك باللعبة أذكياء..

هدول كانو قادة مشروع اللعبة الألكترونية ...بيبقا عنا مهندسي الصوت والمصممين والمبرمجين والرسامين ومهندسي محرك الرسوميات ومجربي الألعاب هدول رح يكون ألن مقالة  هيي الجزء التاني لهاد المقال...تابعونا